வட சென்னை ஓராண்டில் வளர்ச்சியடையும் திட்ட பணிகள் ஆய்வுக்கு பின் முதல்வர் உறுதி

வடசென்னை வளர்ச்சி திட்டத்திற்கு, 1,000 கோடி ரூபாய் ஒதுக்கப்படும் என சட்டசபையில் அறிவித்தேன். இப்போது, பல்வேறு துறைகளின் ஒத்துழைப்போடு 6,309 கோடி ரூபாய் மதிப்பில் பணிகள் நடந்து வருகின்றன.

மொத்தமுள்ள 252 பணிகளில் 29 பணிகள் முழுமையாக முடிந்துள்ளன. எஞ்சியுள்ள பணிகள் விரைவில் முடியவுள்ளன.

ஓராண்டு காலத்திற்குள் அனைத்து பணிகளையும் முடிக்க வேண்டும் என, அனைத்து துறை அலுவலர்களுக்கும் அறிவுறுத்தியுள்ளேன். வடசென்னையை பொறுத்தவரை ஓராண்டிற்குள் வளர்ந்த சென்னையாக நிச்சயமாக உருவாகும் என்ற நம்பிக்கை எனக்கு இருக்கிறது.

இவ்வாறு முதல்வர் கூறினார்.

முதல்வர் ஆய்வின்போது ஹிந்து சமய அறநிலைய துறை அமைச்சர் சேகர்பாபு, மேயர் பிரியா, வீட்டுவசதி மற்றும் நகர்ப்புற வளர்ச்சி துறை கூடுதல் தலைமை செயலர் காகர்லா உஷா உள்ளிட்டோர் பங்கேற்றனர்.

முதல்வர் ஆய்வால் வாகன நெரிசல்

வடசென்னையில் நடந்து வரும் வடசென்னை வளர்ச்சி திட்ட பணிகளை ஆய்வு செய்யும் விதமாக, வடசென்னையில் பிரதான சாலைகள் வழியாக முதல்வர் ஸ்டாலின் பயணித்தார்.முதல்வருடன் கான்வாயில் பாதுகாப்பு வாகனங்கள், அமைச்சர், உயர் அதிகாரிகள், மேயர், மாநகராட்சி மண்டல குழு தலைவர்கள் மற்றும் கவுன்சிலர்கள் வாகனங்களில் அணிவகுத்தனர். இச்சாலைகளில் மழைநீர் கால்வாய், மெட்ரோ ரயில் உள்ளிட்ட பல்வேறு கட்டுமான பணிகள் நடந்து வருகின்றன. இதனால், போக்குவரத்து தாமதம் ஏற்படுகிறது.இந்நிலையில் முதல்வர் காலை 9:30 மணி முதல் ஆய்வு செய்ததால், பல பிரதான சாலைகளில் போக்குவரத்து நிறுத்தப்பட்டது. இதனால், பள்ளி, கல்லுாரிக்கு சென்ற மாணவர்கள், அலுவலகம், வேலைக்கு சென்றோர் கடும் அவதிக்குள்ளாகினர். இதுபோன்ற ஆய்வை அலுவலக நேரத்தில்தான் முதல்வர் ஸ்டாலின் மேற்கொள்ள வேண்டுமா என மாநகர பஸ் பயணியர், பொதுமக்கள் விரக்தியுடன் கூறினர்.