மணலி பொதுக் கூட்டத்தில் சைதை சாதிக் பேச்சு : ‘டெல்லி’ வந்தாலும் ‘கில்லி’ வந்தாலும் 2026ல் திமுக ஆட்சி தான் வரும்

கூட்டத்தில், சைதை சாதிக் பேசியதாவது: கட்சி ஆரம்பித்தவுடன் நடிகை திருமணத்திற்கு கோவா சென்ற நடிகர் திமுகவை ஒழிப்போம் என்று பேசுகிறார். இன்று பத்திரிகை, தொலைக்காட்சிகளில் 2026ல் யார் ஆட்சிக்கு வருவார், அதிக வாக்குகள் யார் பெறுவார்கள், கூட்டணி நீடிக்குமா என்று கேள்வி எழுப்புகிறார்கள். டெல்லி வந்தாலும் கில்லி வந்தாலும் 2026ல் திமுகதான் ஆட்சிக்கு வரும். இந்தியாவில் பெண்கள் முன்னேற்றத்திற்காக நல்லது செய்த அரசு இந்தியாவில் திமுகவை விட்டால் வேறு அரசு இல்லை. அம்பேத்கரை அமித்ஷா நாடாளுமன்றத்தில் இழிவுபடுத்துகிறார். இதற்கு எடப்பாடி வாய் திறந்தாரா, அம்பேத்கர் புத்தகத்தை வெளியிட்ட நடிகர் கண்டனம் தெரிவித்தாரா, நாடாளுமன்றத்தின் மைய மண்டபத்தில் அமைச்சர் அம்பேத்கரை இழிவுபடுத்தி பேசியவுடன் 24 மணி நேரத்தில் வீதிக்கு வந்து திமுக போராட்டம் நடத்தியது. இவ்வாறு அவர் கூறினார். இதில், மண்டலக்குழு தலைவர் தி.மு.தனியரசு, பகுதிச் செயலாளர்கள் அருள்தாசன், புழல் நாராயணன் மற்றும் பல்வேறு அணிகளைச் சேர்ந்த நிர்வாகிகள் கலந்து கொண்டனர்.