கிருஷ்ணன் – விஜயலட்சுமியின் வயலின் இசையில் நிலவிய பக்தி

அடுத்து, தியாகராஜர் இயற்றிய கன்னட கௌளை ராகம், ரூபக தாளத்தில் அமைந்த ‘சொகுசு ஜூட தரமா’ எனும் கீர்த்தனையை இசைத்தனர். மனதிற்கு சுகமான கற்பனை ஸ்வரங்களை இதில் சேர்த்திருந்தனர். அடடா அட்டகாசம்.

அடுத்தபடியாக, அம்பாளை போற்றி, ‘ஷங்கரி ஷம்குரு சந்திரமுகி அகிலாண்டேஸ்வரி’ என்ற சாவேரி ராகம், ஆதி தாளம், திஸ்ர நடையில் அமைந்த கீர்த்தனையை இசைத்தனர்.

பின், பெருமாளை போற்றிப் புகழும் ‘ஸ்ரீனிவாச’ எனும் ஹம்ஸா நந்தி ராகத்தில் அமைந்த கீர்த்தனையை இசைத்தனர். கோவில் மூலஸ்தானத்தில் நிலவும் பக்தி அலைபோல், மனதினுள் அமைதியை கொண்டு வந்தது.

பின், கீரவாணி ராகத்தை ஆலாபனை செய்யத் துவங்கினர். நீண்ட நெடிய நேரம், தங்களுக்கே உரிய ‘லால்குடி பாணி’யில் இசைத்து, ராகத்தின் உச்சகட்ட ரசனையை கொண்டு வந்தனர்.