புறக்காவல் நிலையங்களை பராமரிப்பது யார்? குழப்பம்! மாறி மாறி கைகாட்டும் போலீஸ், மாநகராட்சி!

கேள்விகளும், வினோத பதில்களும்

போலீஸ் பூத் குறித்த மனுதாரரின் கேள்விகளும், அதற்கு, கீழ்ப்பாக்கம் காவல் மாவட்ட துணை கமிஷனர் அனுப்பியுள்ள பதில்களும் வருமாறு: ஒரு பகுதியில் காவல் உதவி மையம் எனப்படும் போலீஸ் பூத் அமைக்கும் முன், கடைப்பிடிக்கும் அரசு சட்டம் மற்றும் விதிமுறைகள் பற்றிய தகவல்கள் என்ன? காவல் நிலைய எல்லைக்குட்பட்ட பகுதிகளில் அமைக்கப்படும் காவல் உதவி மையம், பொது மக்களின் தேவைக்காகவும், பாதுகாப்பு தொடர்பாக அமைக்கப்படுவதால், அதற்கென தனிச்சட்டம் ஏதும் இல்லை.ஒரு போலீஸ் பூத்தில் இருக்க வேண்டிய பதிவேடுகள், காவல் துறை அதிகாரிகளின் எண்ணிக்கை மற்றும் திறந்திருக்க வேண்டிய நேரம் பற்றிய தகவல் என்ன? காவல் உதவி மையம் 24 மணி நேரமும் இயங்கும். அங்கு, பொது நாட்குறிப்பு பராமரிக்கப்படும். சுழற்சி முறையில் காவலர்கள் பணியமர்த்தப்படுவர். அவ்வாறு, 24 மணி நேரமும் இயங்காத காவல்உதவி மையத்தில், செக்டார் எனப்படும் ரோந்து போலீசார் தேவைப்படும் நேரத்தில் அங்கு பணியில் இருப்பர்.காவல் உதவி மையத்தின் பராமரிப்புக்கு பொறுப்பான காவல் நிலைய அதிகாரி யார்?காவல் உதவி மையத்தில் சுழற்சி முறையில் பணியமர்த்தப்படும் காவலர்களால், பராமரிப்பு மேற்கொள்ளப்படும்.ஒரு காவல் உதவி மையம் அமைக்க ஆகும் செலவுகள், காவல் துறை கையாளும் முறைகள் மற்றும் சென்னை மாநகராட்சியிடம் அனுமதி கேட்கும் முறைகள் என்ன? மனுதாரர் கோரிய தகவல்கள், கீழ்ப்பாக்கம் மாவட்ட காவல் நிலைய ஆவணங்களில் இல்லை.சென்னையில் முதன் முதலாக, காவல் உதவி மையம் அமைத்த ஆண்டு மற்றும் தற்போது வரை காவல் உதவி மையத்தால் பெறப்பட்ட பயன்கள் என்ன?சென்னையில் முதன் முதலாக காவல் உதவி மையம் அமைத்த ஆண்டு தொடர்பாக, கீழ்ப்பாக்கம் மாவட்டத்தில் தகவல் இல்லை.

வளையத்திற்குள் சென்னை

சென்னையில் குற்றச்செயலில் ஈடுபடுவோர், வெளியூர் மற்றும் வெளி மாநிலங்களுக்கு தப்பிச்செல்லாத வகையில், சோதனைச்சாவடிகள் அமைக்கப்பட்டு வருகின்றன. அவற்றில், எஸ்.ஐ., உட்பட நான்கு போலீசார் சுழற்சி முறையில் பணியமர்த்தப்பட்டு உள்ளனர். இ.சி.ஆர்., அக்கரை, ஓ.எம்.ஆர்., காரப்பாக்கம், மவுன்ட் பூந்தமல்லி சாலையில் இந்தியா ஷூ கம்பெனி அருகிலும், போரூர் சுங்கச்சாவடி, வானகரம், மாதவரம் மஞ்சம்பாக்கம் சுங்கச்சாவடி, எம்.ஆர்.எப்., எண்ணுார் விரைவுச் சாலை, செங்குன்றம் காவாங்கரை சந்திப்பு, திருவொற்றியூர் நெடுஞ்சாலையில் எம்.ஆர்.எப்., சந்திப்பு, ஜி.எஸ்.டி.,சாலையில் சர்வதேச விமான நிலையம், வேளச்சேரி கைவேலி ஜங்ஷனில் உள்ள சாவடிகள் நவீனப்படுத்தப்பட உள்ளன. இந்த சாவடிகளில், நவீன கண்காணிப்பு கேமராக்கள் பொருத்தப்பட உள்ளன. காவல் துறையின் பதிவேட்டில் உள்ள குற்றவாளிகள் யாரேனும், அந்த சோதனைச்சாவடிகள் வழியாக சென்றால், கண்காணிப்பு கேமரா படம் பிடித்து, மேல் அதிகாரிகளுக்கு தானியங்கி வாயிலாக அனுப்பும் வசதியும் செய்யப்பட உள்ளது. மேலும், வாகனங்களின் பதிவு எண்களும் கேமராவில் பதிவாவதால்,திருட்டு வாகனமாக இருந்தால் அதையும் கண்டுபிடித்து போலீசாருக்கு சுட்டிக்காட்டி விடும். இந்த நடவடிக்கையால், வெளியூர், வெளிமாநிலங்களுக்கு குற்றவாளிகள் தப்பிச் செல்வது தடுக்கப்படும் என, போலீசார் தெரிவித்துள்ளனர்.